April 18, 2020
Mayaon 33 pa nga gindududahan nga kaso san COVID-19 sa probinsya
Yana nga adlaw, Abril 18, 2020, mayaon pa 33 nga gindududahan nga kaso san COVID-19 sa probinsya, subay san pinakaurhi nga report san Provincial Health Office ngan Department of Health Provincial Office.
Sini nga ihap, 2 nga kaso an admitted sa hospital tungod san grabe nga sintomas. Samtang, 16 an discharged na sa pagkakahospital pero ginpapasunod pa sin home isolation. Dugang sini, 9 pa nga kaso an naitala nga mild an sintomas ngan naka-home isolation, ngan yaon pa 6 nga mild cases an nakabutang sa community isolation unit san munisipyo san Catarman (5) ngan san Rosario (1).
May naman naitala nga 3 nga gindududahan nga kaso sin COVID-19 an namatay, diin duha sini nagnegatibo na sa COVID test. An ika-3 nga suspected case in dire pa la maiha nga namatay tungod san hypovolemic shock dara san severe dehydration ngan severe acute respiratory infection (SARI). Subay san bag-o nga guidelines san DOH bahin san klasipikasyon san mga ginsususpetsahan nga kaso san COVID-19, gin-aapi sa ihap an tanan nga kaso nga nagpapakita sin bisan sayo la nga sintomas san COVID-19 pareho san respiratory infection. Pero myentras dire ini nakukumpirma pinaagi sin test, diri masusugad nga positibo sa COVID-19 an pasyente.
Sa yana, mayaon 262 na nga suspected COVID cases an nakarekober ngan ginkukunsidera na nga improved.
Sa kabug-usan, umabot na sa 301 an naitala nga suspected COVID-19 cases sa probinsya tikang san nagtikang an monitoring san ikaduha nga semana san Marso 2020.
Apisar san naghahabubo nga ihap san gindududahan nga kaso san COVID-19 sa probinsya, padayon nga nagsasagdon an gobyerno probinsyal nga maglikay an ngatanan tungod kay presente pa an tarhug sini nga sakit. Pirmi magsul-ot sin face mask, dumistansya sa iba, pakusgon an resistensya, maghugas pirmi san kamot ngan magsunod sa mga abiso ngan regulasyon san gobyerno.