Nagpapadayon an panhatag sin ayuda san
gobyerno probinsyal sa mga biktima san bagyo
Usman sa magkalain-lain nga parte san probinsya.
An relief goods in ginkokomponer sin pagkaon, mga
bado, sapatos, tsinelas, gamit sa pag-eskwela, ngan
mga gamit sa balay sugad san kutson, taplak, banig
ngan mga ulunan. An pagkaon nga nahisusulod sa food
packs in gin-aapihan naman sin bugas, kape, noodles,
cupcakes ngan mga de lata sugad san sardinas ngan
corned beef. Samtang mga notebooks, lapis ngan
ballpen an ginpanhatag nga gamit pan-eskwela.
Nahibaroan nga ini nga bulig sa mga biktima san bagyo
in nahimugso pinaagi san hangyo ni Gobernador Jose Ong
Jr. sa kanya mga kapamilya, kasangkayan, mga pribado
nga indibidwal ngan establisyemento nga kaurugan
nakabase sa Manila.
Ginmando ni Gobernador Ong an paghatag prayoridad
san mao nga mga ayuda sadton mga ginbaha o nadanyos
an kabablayan subay pa man san report nga ginpaabot
san mga munisipyo ngadto sa Provincial Disaster Risk
Reduction and Management Office (PDRRMO).
Sa pinakaurhi nga report san PDRRMO petsado Enero
3, 2019 ngan pirmado ni Mr. Rei Josiah Echano, an mga
bungto san Lope de Vega, Catarman, Mondragon ngan
San Roque, an may pinakadamo nga mga pamilya nga
apektado san nasabi nga kalamidad. Sa kabug-usan,
mayaon sin 48,900 nga pamilya ngan 224,389 nga mga
indibidwal an nahitala san PDRRMO nga naapektuhan ni
Usman sa bug-os nga Norte san Samar. ¶
Items Received from Donors
Tags
ARLYN C. TEPACE